Gwamnatin Tarayya Ta Sake Buɗe Rukunin na Biyu na Shirin TVET – Ga Yadda Zaku Zaɓi Cibiyar Horarwarku

Gwamnatin Tarayya ta sanar da sake buɗe rukunin na biyu (Cohort/Batch) na shirin TVET, wanda hakan wata babbar dama ce ga matasa a faɗin ƙasar nan domin koyon sana'o'in hannu tare da samun tallafin alawus na naira ₦22,500 kowane wata.

Idan kuna da sha'awar cike wannan tallafi, ko kuma kuna fuskantar ƙalubale wajen zaɓar cibiyar horarwa (Training Center), wannan bayani zai taimaka muku daki-daki kan yadda zaku kammala rajistarku cikin nasara.

Game da Shirin TVET:

Shirin TVET wani babban mataki ne na Gwamnatin Tarayya da aka tsara domin ƙarfafa matasan Najeriya ta hanyar koya musu sana'o'in dogaro da kai da kuma ba su tallafin kuɗi a lokacin horon.

Matakan Zaɓar Cibiyar Horarwa:

1. Shiga Shafin Yanar Gizo:
   Ziyarci babban shafin TVET a nan: https://www.tvet.education.gov.ng/

2. Danna Maballin "Apply Now":
   Yayin da shafin ya buɗe, taƙaita ƙasa ka nemo inda aka rubuta “Apply Now” sannan ka danna.

3. Yin Rajista ko Shiga (Login):
   Idan ka riga ka yi rajista a baya, shiga (Login) kawai zaka yi. Idan kuma sabon mai nema ne, sai ka buɗe sabon asusu (Register).

4. Amincewa da Ƙa’idoji (Terms & Conditions):
   Wani sako zai bayyana mai ɗauke da ƙa’idojin shirin. Taƙaita ƙasa ka danna “I Agree”.

5. Cike Bayanan Kai (Personal Details):
   Shigar da adireshinka na yanzu, Jiha (State), Ƙaramar Hukuma (LGA), imel, da lambar wayarka, sannan ka danna “Proceed”.

6. Zaɓar Sana’a (Skill):
   Danna “Select Skill” domin ganin jerin sana'o'in da ake koyarwa. Zaɓi sana'ar da kake so, sannan ka danna “Proceed”. Lura: Tsawon lokacin horo yana tsakanin watanni 6 zuwa 12 dangane da sana'ar da ka zaɓa.

7. Amsa Tambayoyin Bincike (Quick Survey):
   Zaka amsa tambayoyi guda uku game da sana'ar da ka zaɓa:

   • Gwanintarka (Proficiency): Zaɓi “Average”.

   • Yawan yin sana'ar (Frequency): Zaɓi “Occasionally”.

   • Dalilin koyon sana'ar (Motivation): Zaɓi “To uplift my skills” ko “To scale up my business”.

   • Daga nan ka danna “Proceed”.

Yadda Ake Zaɓar Cibiyar Horo (Inda Matsalar Take):

Wannan matakin yana da ɗan wahala saboda wasu cibiyoyin ba sa bayyana nan take. Idan ka tarar babu cibiyar horo a wurinka, ka gwada sauya sana'ar da ka zaɓa, ko ka sauya Jiha ko Ƙaramar Hukuma akai-akai har sai ka ga cibiyoyin da suke buɗe sun bayyana. A halin yanzu, akwai cibiyoyin da suke buɗe a jihohin Lagos, Zamfara, da Borno.

Idan kun bi waɗannan matakan daki-daki, zaku iya samun nasarar zaɓar cibiyar horo da ta dace da sana'ar da kuke son koya.

Kada ku karaya, ku ci gaba da gwada hanyoyi daban-daban har sai kun samu gurbi. Shirin TVET dama ce mai kyau ta samun ilimin sana'a da kuma tallafin kuɗi a lokaci ɗaya.