Gwamnatin Tarayya Ta Buɗe Shafin Neman Tallafin Shirin TVET (Rukuni na Biyu - 2026)

Ma’aikatar Ilimi ta Tarayya (FME) ta sanar da buɗe shafin yin rajista ga rukunin na biyu (Second Batch) na shirin nan na koyon sana’o’i da fasaha wato Technical and Vocational Education and Training (TVET), laga ranar 13 ga watan Afrilu, 2026.

Bayanai Game da Shirin

Wannan shiri ne da aka tsara domin bai wa matasa ilimin sana’o’in hannu a sassa daban-daban. Waɗanda za su halarci horon za su riƙa samun alawus na naira ₦22,500 kowane wata domin kuɗin mota da sauran buƙatu, domin tabbatar da sun kammala horon cikin nasara.

• Tsawon Lokaci: Horon zai ɗauki tsawon watanni 6 zuwa shekara 1.

• Alawus (Stipend): Naira ₦22,500 kowane wata, dangane da yadda mutum yake halartar horon (za a riƙa tantancewa da na'urar biometric).

• Fa’idodi: Horon kyauta ne, za a ba ku takardar shaida (Certificate) da aka amince da ita a ƙasa baki ɗaya, sannan akwai yiwuwar samun kayan aiki (starter packs), tallafi, ko rance mai rahusa daga Bankin Masana’antu (Bank of Industry - BOI).

• Cibiyoyin Horo: Akwai cibiyoyin horarwa sama da 1,600 a faɗin jihohi 36 na Najeriya da kuma birnin tarayya (FCT).

Sana’o’in da Ake Koyarwa

Shirin yana koyar da sana’o’i a sassa kusan 24 zuwa 28, da suka haɗa da:

• Fasahar Zamani (Digital & Tech): ICT, Media, gyaran kwamfuta da wayar hannu (GSM).

• Gine-gine (Construction): Wutar lantarki, aikin famfo (Plumbing), walda (Welding), tiling, da kafintanci.

• Noma da Masana'antu: Noman zamani, kiwon kaji ko ƙudan zuma, da ɗinki (Fashion Design).

• Sabis (Hospitality): Abinci da kek, yawon buɗe ido, da kwalliya (Cosmetology).

Abubuwan da Ake Buƙata (Eligibility)

• Shekaru: Tsakanin shekara 18 zuwa 35 (wasu majiyoyin sun nuna har zuwa 45).

• Takardu: Lambar tantancewa ta ƙasa (NIN) da kuma lambar asusun banki (BVN).

• Ilimi: Aƙalla mutum ya kasance yana da shaidar kammala firamare (FSLC).

Yadda Za a Cike (How to Apply)

Domin cike wannan tallafi, bi waɗannan matakan a dandalin Ma’aikatar Ilimi ta TVET:

1. Bude asusu (Create an account) a dandalin: https://www.tvet.education.gov.ng/

2. Tabbatar da shaidarka ta hanyar amfani da NIN da BVN.

3. Zaɓi nau'in horon da kake so: Short-Term Certificate (STC) ko kuma Vocational Enterprise Institutions (VEI).

4. Zaɓi sana’ar da kake son koya da kuma cibiyar horarwa mafi kusa da kai.

5. Ɗora takardun da ake buƙata, sannan ka tura (Submit).

Shin kuna son ƙarin bayani kan cibiyoyin horarwa da ke jihar ku? Kuna iya tuntubarmu a sashen sharhi.

Allah ya ba da sa'a!