Abubuwa 10 Da Bai Kamata Ka Faɗa Wa Mace Ba A Farkon Soyayya

Domin gina alaƙa mai ƙarfi, ya kamata namiji ya kiyaye waɗannan kalaman a farkon haɗuwa:

1. "Tura mini hotonki": Wannan maganar tana iya lalata duk daɗin hirarku. Za ta iya fassara cewa ba da gaske kake ba, sha’awa ce kawai ta kawo ka. Ka bari sai kun daɗe da juna; mata da yawa ba sa son wannan gaggawar.

2. "Kin yi kyau sosai, wallahi na kasa barci saboda ke": Za ta iya ɗauka wasa kake yi ko kuma kana yi mata kalaman kwaikwayo ne na yaudara.

3. "Kin taɓa yin soyayya kafin ni?": Wannan tambaya ce da ke nuna rashin girma. Ka bari lokaci ya bayyana komai, kada ka zama mai binciken ƙwaƙwaf tun farko.

4. "Ina so in zama namijin da zai mallake ki gaba ɗaya": Wannan maganar tana sa mace jin tsoro. Soyayya ba ta farawa da mallaka, tana farawa ne da girmamawa da fahimta.

5. "Me ya sa ba kya da saurayi yanzu?": Ba lallai ne mace ta kasance da saurayi a kowane lokaci ba. Wani lokacin tana buƙatar hutu ne daga abin da ya gajiye ta.

6. "Idan na aure ki, za ki daina aiki ko?": Wannan tambayar tana nuna cewa za ka zama mai takura mata ne tun kafin ku zauna.

7. "Ke da wa kuke hira?": Sabon sani ne kuke yi, ba ka da ikon yi mata wannan tambayar. Yin hakan yana nuna wuce gona da iri.

8. "Zan iya zuwa gidanku in gan ki?": Idan ka faɗi haka ba tare da tsari ko niyyar aure ba, bai dace ba. Amma idan da gaske kake, to ka bi ta hanyar da ta dace wajen neman izinin iyayenta ko wakilinta. Wannan shi ne mutunci.

9. Fara kiran ta da "Baby" ko "Sweetheart": Idan ka yi hakan da wuri, za ta ɗauka kana wasa da soyayya ne. Ka fara da girmamawa kafin ka koma ga laƙabin soyayya. Dakata kaɗan, komai yana da lokacinsa.

10. "Ina sonki sosai" (Bayan kwana biyu da haɗuwa): Soyayya ba abin gaggawa ba ne. Maganar so tana da nauyi, kada ka zubar da darajarta ta hanyar sauri.

Sakon Ƙarshe:
’Yan’uwa maza ku sani, soyayya tana farawa ne da girmamawa, nutsuwa, da nuna hankali. Mace tana son mutumin da zai nuna mata ƙawa da karamci, ba gaggawa ba. Shi ya sa ya kamata a kiyaye.