INEC Ta Buɗe Shafin Rijistar ga Yan Media Domin Yaɗa Labarai da Sa Ido Kan Zaɓe a Najeriya na 2027

Hukumar Zaɓe Mai Zaman Kanta ta Ƙasa (INEC) ta buɗe sabon shafinta na yanar gizo domin bai wa kafafen yaɗa labarai damar yin rajista da neman izinin bayar da rahoto kan zaɓukan da ake gudanarwa a Najeriya.

Ta wannan sabon shafi mai suna INEC Media Accreditation Portal, kafafen yaɗa labarai za su iya yin rajistar ƙungiyoyinsu, neman izinin ɗaukar rahotannin zaɓe da kuma gabatar da sunayen ’yan jaridun da suke son a amince musu da su domin gudanar da aikin ɗaukar rahotanni a lokacin zaɓe.

Yadda Ake Yin Rajista

Domin fara amfani da shafin, kowace kafar yaɗa labarai za ta fara ne da yin rajistar ƙungiyarta tare da cike bayanan da ake buƙata.

Ga hanyoyin shiga shafin:

• Rajistar sabuwar kafar yaɗa labarai: https://imap.inecnigeria.org/register

• Shiga shafin (Login): https://imap.inecnigeria.org/login

Matakai Shida Na Samun Amincewar INEC

Hukumar INEC ta tsara matakai guda shida da kafafen yaɗa labarai za su bi domin samun izinin aikin ɗaukar rahotannin zaɓe.

Mataki na 1: Neman Izinin Aikin Zaɓe

Da zarar lokacin neman izini ya buɗe, kafar yaɗa labarai za ta zaɓi jihohin da take son gudanar da aikin, ta saka bayanan wanda za a riƙa tuntuɓa tare da loda wasiƙar neman izini da kuma kwafin wani sabon rahoto ko wallafa, idan tana da shi.

Mataki na 2: Tantancewa da Ba da Shawara

Jami'an INEC na jiha ko hedikwatar hukumar za su duba buƙatar da aka gabatar domin tantancewa da ba da shawarar ci gaba da ita.

Mataki na 3: Ƙayyade Adadin Ma'aikatan da Za a Amincewa da Su

INEC za ta tantance adadin ma'aikatan da kowace kafar yaɗa labarai za ta iya tura wa wuraren kaɗa ƙuri'a da cibiyoyin tattara sakamako. Haka kuma, hukumar na da damar mayar da buƙatar domin sake dubawa ko kuma ƙin amincewa da ita.

Mataki na 4: Gabatar da Sunayen 'Yan Jaridu

Bayan samun ƙayyadadden adadi, kafar yaɗa labarai za ta gabatar da sunayen 'yan jaridunta tare da bayyana jihar da kowannensu zai gudanar da aikinsa.

Mataki na 5: Amincewa da Sunayen 'Yan Jaridu

INEC za ta tantance sunayen dukkan 'yan jaridun da aka gabatar, sannan ta amince ko ta ƙi amincewa da kowannensu. Haka kuma, za a iya ganin sakamakon tantancewar da duk wani ƙarin bayani da hukumar ta bayar.

Mataki na 6: Karɓar Katin Shaidar Aiki

'Yan jaridun da aka amince da su za su samu katin shaidar izinin aiki (Media Accreditation Tag) mai ɗauke da lambar QR domin jami'an hukumar su iya tantance sahihancin katin.

Waɗanne Kafafen Yaɗa Labarai Ne Za Su Iya Yin Rajista?

Shafin INEC ya bayyana cewa waɗannan kafafen yaɗa labarai za su iya neman izinin aikin:

1. Gidan talabijin (Television).

2. Gidan rediyo (Radio).

3. Jaridu (Newspapers).

4. Kafafen yaɗa labarai na intanet (Online Media).

5. Mujallu (Magazines).

Haka kuma, kafafen yaɗa labarai na cikin gida da na ƙasashen waje za su iya neman izinin.

Shin Ɗan Jarida Zai Iya Neman Izini Da Kansa?

A'a. Bisa bayanin da ke shafin INEC, ba ɗan jarida ɗaya-ɗaya ne zai nemi izini da kansa ba. Sai dai kafar yaɗa labarai da yake aiki da ita ce za ta yi masa rajista da gabatar da sunansa domin tantancewa da amincewa.

Haka kuma, izinin aikin ɗaukar rahotannin zaɓe yana aiki ne bisa kowane zaɓe, don haka dole ne kafafen yaɗa labarai su nemi izini a duk lokacin da aka shirya sabon zaɓe.

Yadda Za Ka Fara Rajista:

Domin yin rajistar kafar yaɗa labaranka, ka shiga shafin hukuma na INEC ta wannan hanyar:

https://imap.inecnigeria.org/register

Lura: Yin rajista ba yana nufin an riga an ba kafar yaɗa labarai ko ɗan jarida izinin aiki ba. Sai an bi dukkan matakan tantancewa da amincewar INEC.