Idan kai ɗalibi ne mai basirar ƙirƙire-ƙirƙire a Najeriya, akwai labari mai daɗi a gare ka! Ma’aikatar Ilimi ta ƙaddamar da tallafin Student Venture Capital Grant (S-VCG), wanda zai bai wa ɗalibai damar samun tallafin Naira Miliyan 50 don aiwatar da ra’ayoyinsu na kasuwanci ba tare da buƙatar biyan kuɗi ko bayar da hannun jari ba.
Menene S-VCG?
Wannan shiri na ɗaya daga cikin ajandar “Renewed Hope” ta gwamnatin Shugaba Bola Ahmed Tinubu. An tsara shi ne domin tallafawa ɗalibai masu ra’ayoyin kasuwanci a fannonin Kimiyya, Fasaha, Injiniya, Lissafi (STEM) da Harkokin Lafiya, domin su haɓaka kasuwancin nasu.
Abubuwan Da Za A Amfana:
Tallafin Kuɗi: Naira Miliyan 50 kai tsaye don gudanar da kasuwanci.
Horo: Samun horo na musamman kan dabarun kasuwanci.
Jagoranci: Samun jagoranci daga ƙwararru masu ilimi.
Kayan Aiki: Samar da kayan aiki da dandalin fasaha don taimakawa wajen gina kasuwanci mai ɗorewa.
Haɗin Gwiwa Da Google
Shirin ya ƙulla haɗin gwiwa da kamfanin Google domin yin amfani da fasahar AI wajen tantance masu neman tallafin. Duk wanda ya yi nasara zai samu lasisin Google Gemini Pro na shekara guda kyauta, tare da kayan koyon fasaha don ƙara inganta kasuwancinsa.
Yadda Ake Neman Tallafin
An buɗe shafin neman tallafin ga duk ɗaliban Najeriya masu rajista a makarantun da gwamnati ta amince da su.
Ku hanzarta neman tallafin ta wannan shafin: svcg.education.gov.ng
Kar ku bari wannan dama ta wuce ku; ku tashi tsaye domin zama ɗaya daga cikin gwarzayen 'yan kasuwa na gaba a Najeriya
Allah yasa mu dace baki daya 
0 Response to "An Buɗe Shafin: Gwamnatin Tarayya, Ƙarƙashin Ma’aikatar Ilimi, Ta Ƙaddamar Da Sabon Shirin Tallafi Mai Taken "Student Venture Capital Grant" (S-VCG) - Ku Hanzarta Cikawa"
Post a Comment